قصة العجوز

نفس المكان اللي سيبته فيه علشان أطمن عليه لاني كنت حاسس بالذنب.
سموه قرار غبي أو قرار شجاع مني مش مهم المهم اني بالفعل لبست ونزلت .
طول الطريق وحاجة جوايا بتقولي ارجع ماتروحش أحسنلك .. فضلت أرسم سيناريوهات كتيرة في دماغي وكنت بدعي ربنا ان مافيش ولا سيناريو كنت بفكر فيه يحصله لان كلهم مكنوش خير .
وصلت عند المدرسة .. بصيت على السور وكأني المفروض اني ألاقيه قاعد على السور .. بس مكنش موجود .. وعلشان أكون أمين في كلامي .. أنا لقيت الجلابية اللي كان لابسها محطوطه على السور في نفس المكان اللي شوفته كان قاعد فيه !! .
طول ما انا ماشي على الكوبري كنت حاسس بل وسامع خطوات من ورايا .. وده خلاني مابصش ورايا وأكمل في طريقي لحد المكان اللي سيبت فيه معاذ.. وبدأت أنادي عليه 
_ معاذ .. يا معاذ أنت هنا .. معاذ .
فجأة سمعت صوت فرامل عربية وصوت خبطة قوية .. سمعت أه .. بس ماشوفتش حاجة لان مكنش فيه حد ماشي على الكوبري أصلا!! .
بلعت ريقي وأنا بنادي على معاذ للمرة التانية .. مشيت تحت الكوبري كام خطوة لحد ماصعقت لما لقيت موبيله مرمي على الأرض ومتكسر !! .
مسكت الموبايل واتأكد انه بتاع معاذ .. تحت الكوبري كان في عربيتين راكنين وكومة ژبالة جنب العربيتين .. لما مسكت الموبايل سمعت صوت جاي من عند الژبالة .. صوت حد بيئن !! .
لما استنيت شوية واتأكدت من الصوت قربت اكتر علشان الاقي معاذ قاعد جنب كومة الژبالة وضامم رجله بإيده وبيترعش !! .
_معاذ .. انا عاصم .. باصصلي كدا ليه وقاعد هنا من امتى .. هات ايدك وقوم معايا .
مكنش مركز عليا .. كان باصص ورايا وهو بيبكي .. لما مديتله ايدي علشان يقوم معايا رفض وحط دماغه بين رجله .
صوت نفس هادي .. تزييق .. صوت خطوات بتقرب مني وانا واقف قدام معاذ ومن ورايا العجوز بيقرب علينا وعلى وشه ابتسامة شيطان! .
اللي عملته اني مسكت ايد معاذ وقومته بالعافية وخدناها جري .. مكنش قادر يجري وكل شوية يقع بس كنت بقومه .. مش عارف احنا بنجري فين كل اللي عملناه اننا جرينا وخلاص .
لما بعدنا ووقفنا ناخد نفسنا معاذ مكنش على طبيعته .. كان عمال يعيط بهيستريا .. الفجر أذن وعلشان أخليه يهدى قولتله يلا نتوضا ونصلي الفجر .
وبالفعل عملنا كدا .. وبعد الصلاة خرجنا من الجامع ومعاذ بدأ يبقى أهدى .. متكلمش معايا خالص .. روح بيته بعد ما اديتله الموبايل بتاعه .
حوالي أسبوع ماظهرش وكنت بطمن عليه من والدته .. لانه مكنش بيتكلم .. والدته قالتلي 
_ من اسبوع وهو على الحال ده .. مش عارفه حصله ايه .. ولا بيتكلم ولا حتى بياكل يا ابني .. وكله كوم وصرخاته بالليل كوم تاني .. متعرفش يا عاصم ايه اللي جراله .. قولي متخبيش عليا.
في الحقيقة مقولتلهاش على حاجة لاني أنا شخصيا معرفتش ايه اللي معاذ شافه يخلي لسانه يتعقد ويعمل زي ما والدته قالتلي .. ده خلاني أروحله البيت وأدخل أوضته وأتكلم معاه .
لما دخلتله لقيت دقنه طويلة على غير عادته وكان في ورق كتير مرمي في الاوضة بإهمال .. ورق مرسوم فيه شخص واحد بس .. العجوز !! .. معاذ غاوي رسم .. وكانت دي الطريقة الوحيدة اللي يعبر بيها على